New albumz

Då eg sat på toget heim frå Trondheim i dag kom eg på ein hyggjeleg tanke: det kjem faktisk veldig mykje bra musikk til hausten! Heile fem album som eg har venta er annonsert innan slutten av året, sjølv om det så klart er for godt til å vera sant. Halvparten kjem sikkert neste sommar, så treige som desse artistane er.

Pessimisme til side, dei som har brukt/bruker dette halve året på å spele inn ny musikk, er desse:

Wolfmother
Kaiser Chiefs
Keane
Christer Knutsen
Eagles of Death Metal

At last. Wolfmother sa i 2007 at albumet skulle vera ute "early 2008," men halve året er gått og ingen veit noko, så dei innbiller seg vel at det er kjempekult å sleppe ei plate ingen veit at kjem. Den bør i alle fall bli bra, no som dei har vore i studio sidan august. Eg gler meg!

Kaiser Chiefs har visst blitt litt høge på pæra i det siste, men eg satsar på at det er fordi den nye plata er så hinsides bra at den faktisk blæs Oasis av banen. KC involverer fansen i prosessen, og det er jo flott.

Keane er også flinke til å oppdatere rundt den nye plata, som eg er veldig spent på. Skilnaden blei ganske stor mellom fyrste og andre plate, og no skal visst både bass og el-gitar med, så dette kan bli interessant.

Christer Knutsen si nye plate har eg venta på sidan eg opna denne bloggen, så dette er på tide. Eg satsar på ei knallsterk americanaplate som grensar meir mot tradisjonell rock enn country. Heimesida er i alle fall oppe og går, og sidan Christer er såpass MySpacenerd har me fått bilete frå studio, og det gjer meg spent.

Og sist, men absolutt ikkje minst; Eagles of Death Metal! Heart On er plata eg gler meg mest til akkurat no, eg saknar Jesse Hughes. Mest av alt gler eg meg til at dei skal koma på turnè etter plata er ute, for eg har ikkje sett EoDM live, og det er ein stor skam i seg sjølv. No som Josh er heime i California igjen bør denne plata vera på god veg framover, og intervju med Jesse tyder på at dette blir minst like bra som Death By Sexy. Sweet.


Elles gler eg meg til plata til Franz Ferdinand kjem ut i 2009, men det er lenge til enno. God gammal Franz-rock med afrikanske rytmar høyrest bra ut.
Og Queens skal visst (dvs. håper på) innom studio innan året er omme.

Kan det bli betre?