Just say it

I dag har vore ein fin dag. Eg liker fine dagar. Det er vel noko som seier seg sjølv, i grunn.

Uansett. Veldig lettande å få unnagjort to framføringar på ein dag. Den eine, den i fransken, gjekk veldig bra, eg fekk femmar som beste karakter i klassen, veldig uventa. I kunst og handverk veit eg ikkje korleis det gjekk enno, men eg trur no det gjekk greitt nok.
Og så fekk eg snakka med Michal om matematikken, og me fann ut av det. Òg eg fann endeleg ei bok til norskoppgåva.

Det var vel eigentleg berre det som gjorde dagen så fin, det var faktisk ein så befriande skuledag at når eg kom heim, gjorde eg lekser resten av kvelden. Eg fekk endeleg gjort ferdig oppgåvene om "Karen", og byrja på samfunnsfagleksene. Og eg hadde ikkje noko imot å gjera det heller. Wow.

Og i dag tidleg fann eg ut at det antakelig blir ein Zahlkonsert til på meg i år. 18. august, på Kloppstockfestivalen, på Harestua. Eg har allereie sjekka alt; det startar 15:00, eg må ta Gjøvikbanen som kostar ca. 50 kr for barn (Harestua er jo berre sju mil unna her eg bur), og når festivalen er slutt køyrer eigne bussar ein tilbake til Oslo. Laurdag før skulestart. Alt passar, det einaste er at billettane er litt vel dyre.. Men eg har aldri latt pengar stoppa meg når det kjem til konsertar, og det skal eg heller ikkje no. Så no har eg antakelig noko nytt å sjå fram til. Håper eg.

Eg fann også ut i dag at AUF-leiren sjølvsagt kostar pengar, det hadde jo ikkje eg tenkt på. Men overraskande nok, og det var verkeleg overraskande, sa mamma at me fint skulle klare å fiske opp dei ca. 1000 kronene viss dette var noko eg verkeleg ville. Og ikkje treng eg å ofre nokre av festivalane for det heller. Litt for snilt, synst eg nesten, det verkar litt rart. Men eg trur nok ho berre er glad for at eg er blitt politisk aktiv, og sosial, ikkje minst. Ho vil vel ikkje at eg skal sitje på Nebba heile sommaren og klage.

I motsetjing til i dag, var ikkje i går ein så fin dag. Iallfall ikkje starten av han. Eg fekk veta av tannlegen at eg må gå med regulering i over eitt år til, samt trekkje FIRE tenner. Fire jævla stykk. Då har et til saman trokke ni tenner på eit par år. Sjukt. Eg er så drittlei regulering. Men sånn er det vel berre, det blir fint til slutt. Håper eg.
Og så var det konfirmasjonsmøte. Eller kva ein nå skal kalla det. Me sat i to timar og diskuterte sex og samliv, jippi. Og då dei to timane var gått, var eg 26 kondom rikare. Dei berre kom og gav oss ein halv pose kvar. Normalt. Eg hatar sånn sexundervisning. Men me slapp iallfall å demonstrere stillingar då, som Cecilie og dei måtte... Haha, uff. Men det er betre enn kristenpreik uansett. Alt er betre enn det.

I morgon er det konferansetime, kom eg på no. Eg må fylle ut det skjemaet, så må eg gjera litt meir norsklekser, og så må eg leggje meg, eg er stuptrøtt. Snakz.