Kva heiter vel det som gror?

Odd Nordstoga-perioden er ikkje over, den er derimot sterkare enn nokosinne. No er det Odd Nordstoga heile vegen. Herlighet. Men det er greiare å berre innsjå det, og leva det fullt ut, enn å nekte for det. Kunne vore verre, tross alt. Kunne ha vore.. Ole Ivars. Nei, det kunne det ikkje, det kunne aldri vore Ole Ivars fordi det er meg eg snakkar om her. Men Odd Nordstoga ér jo faktisk ein flink fyr då. Veldig flink. Trur eg skal slutte å tenkje på det. Og berre nyte det, for det er jo noko å nyte, det er alltid gøy når eg har oppdaga ny musikk og får heilt dilla. So let's not worry anymore, som Geir så originalt sa.

Eg les ei bok no, "Det angår også deg", som er så bra at eg ikkje kan leggje henne frå meg. Sånn har det ikkje vore med ei bok sidan eg las Mannen som elsket Yngve og Kompani Orheim. Denne handlar om noko ganske anna, nemleg livet i Auschwitz. Eg er blitt heilt oppslukt i alt me har om andre verdskrig no, eg trur ikkje det er mange, om i det heile tatt nokon, andre i klassen som finn det så interessant. Men det er jo eit helvetes interessant tema då, det er det verkeleg. I dag såg me filmen "The Wave" på skulen. Korleis folk berre kan jatte med sånn fattar eg enno ikkje. Om Morten hadde bedt meg om å reise meg og seia "Herr Steen" kvar gong eg vart spurt om noko eller skulle svare på noko, ville eg flydd i flint og nekta plent. Om han bad meg reise meg opp, ville eg muleges reist meg opp og apa etter bevegelsen han viste. Eg lar ingen styre meg slik, eg blir så sur, så sur, så sur. Eg hadde ikkje klart å ta det som ein leik sjølv om det var det eingong, fordi eg veit eg hadde tenkt at det var idiotisk. Det er vel noko tenårings/fjortisalderen tar med seg det, men i den situasjonen kunne det jo nesten vore nyttig òg, iallfall om det var the real deal. Eg klarer berre ikkje sjå for meg meg sjølv verte hjernevaska sånn, men det kan vel ingen.

Men den boka er det siste eg treng akkurat no, eg har så helvetes mykje lekser å gjera, desse to vekene har me hatt meir lekser enn nokon gong før, verkeleg. I natt gjorde eg nynorsk til klokka to, og resten av helga gjekk også med til lekser. I dag har eg fått gjort tre fag. KRL-en må eg gjera ferdig no i kveld, viss ikkje får eg ikkje sova. Var jo det som fekk meg til å sitje oppe i natt, får ikkje sova om eg veit eg har mykje å gjera. Så no må eg gjera ferdig KRL, jobbe litt vidare på engelsken og så sova. Så skal eg opp tidligare enn vanlig for å ta bussen til Lillestrøm, heile skuledagen i morgon går med til ei rettssak me skal sjå i tinghuset der. Det er jo for så vidt spanande då.

Og faen, no har eg byrja å bekymre meg ordentleg på vegne av Arbeiderpartiet og AUF, det kjem ikkje til å ende bra det her med Frp. Eg er redd me kjem til å tape stygt på det. Ver no litt forsiktige då, ver så snille, kjære toppolitikarar. Me treng dykk til valkampen no, la berre Frp fare, ti dei heller i hel.

Men nei, no er det lekser, inga tid å miste.